Քրդական բանվորական կուսակցությունը կարող է արդեն մի քանի օրվա ընթացքում սկսել զենքերը հանձնելու գործընթացը, երեքշաբթի հայտարարել է Թուրքիայի իշխող «Արդարություն և զարգացում» կուսակցության խոսնակը։
Օմեր Չելիկը հավելել է, որ առաջիկա օրերը լինելու են «չափազանց կարևոր՝ ահաբեկչությունից ազատ Թուրքիա ունենալու համար»։
Քրդական կուսակցությունը, որը ավելի քան չորս տասնամյակ արյունալի հակամարտության մեջ է թուրքական պետության հետ, մայիսին որոշում է կայացրել ինքնալուծարվել և դադարեցնել զինված պայքարը։
Կուսակցության՝ Իրաքի հյուսիսում տեղակայված երկու աղբյուրներ հաստատել են, որ մի փոքր խմբավորում նախատեսում է առաջիկա օրերին զենքերը հանձնել Սուլեյմանիայում՝ Իրաքյան Քուրդիստանի քաղաքում։
Իրաքի հյուսիսում հրավիրված եզրափակիչ համագումարից հետո՝ մայիսին, զինյալ խմբավորումը հայտարարեց՝ զենքով հասել են պատմական արդյունքների, բայց հիմա ժամանակն է անցնել դիվանագիտական մեթոդների:
