Քննչական կոմիտեն արդեն ավելի քան 4 ժամ է՝ անհետաձգելի գործողություններ է իրականացնում Երևանում՝ Տերյան փողոցում գտնվող «Տաշիր գրուպ»-ի գրասենյակում:
ՔԿ-ից «Ազատությանը» փոխանցեցին, որ խուզարկություններն իրականացվում են առանձնապես խոշոր չափերով փողերի լվացման և առանձնապես խոշոր չափերով հարկերը, տուրքերը կամ այլ վճարներ չվճարելու հատկանիշներով նախաձեռնված քրեական վարույթի նախաքննության ընթացքում:
Թե երբ է հարուցվել այս նոր վարույթը, Քննչական կոմիտեից չեն մանրամասնում:
Գործարար Սամվել Կարապետյանն այլ գործով մեղադրվում է իշխանությունը զավթելուն ուղղված կոչերի համար, որի շրջանակներում կալանավորված է:
Ներսում են նաև փաստաբանները: Նրանք ևս մինչև այս պահը որևէ տեղեկություն չեն հաղորդել, թե ինչ գործի մասին է խոսքը, որքան է առնչվում Սամվել Կարապետյանին, և ինչ են խուզարկում քննիչները:
Այսօր ավելի վաղ այստեղ էին ժամանել ընդդիմադիր «Հայաստան» խմբակցության պատգամավորներ Գառնիկ Դանիելյանն ու Գեղամ Մանուկյանը: Նրանց ևս թույլ չէին տվել մուտք գործել գրասենյակ: Դանիելյանը թեև մանրամասներին տեղյակ չէր, բայց պնդեց, որ այս ամենը փոխկապակցված է եկեղեցուն պաշտպանող Կարապետյանի՝ հայտարարության հետ:
Այս խուզարկությունից առաջ՝ առավոտյան հրավիրված ասուլիսին Կարապետյանի փաստաբաններից Արամ Վարդևանյանը հայտարարեց, որ իր գործարարի դեմ գործը «քաղաքական է»: Նա պնդեց, որ չնայած Սամվել Կարապետյանը մեղադրվում է իշխանության զավթման կոչի համար, սակայն նման կոչ, ըստ էության չկա:
«Բարձրաձայնվեց եկեղեցու շուրջ ստեղծված իրավիճակը և դրա վերաբերյալ իր պատրաստակամությունը նաև եկեղեցուն պաշտպանելու: Ի տարբերություն այլ աղմկահարույց դեպքերի, քրեական գործերի՝ այս գործը մի առանձնահատկություն ունի, այստեղ ընդհանրապես քրեական գործ չկա», - ասաց նա՝ հավելելով իրավական աբսուրդի մասին:
ԿԱՐԴԱՑԵՔ ՆԱԵՎ «Արմավիր» բանտից՝ ԱԱԾ մեկուսարան. Սամվել Կարապետյանին տեղափոխել են ԿԱՐԴԱՑԵՔ ՆԱԵՎ Սամվել Կարապետյանը «սպառնացե՞լ է պետությանը», թե՞ «քաղբանտարկյալ» էԼրացվում է